شكون لي يستحق عن جدارة شارة الصفر
مساهمة للناشط الفبرايري "ربيع هومازن" و المعتقل السياسي السابق بقصيدة من الزجل الشعري تحت عنوان "شكون لي يستحق عن جدارة شارة الصفر" فيها صور شعرية جميلة حول الوضع السائد في المغرب الغارق في الفساد و الاستبداد..و اليكم نص القصيدة:
"آخر ما غنى قلمي ،فهمني باش تقدر تشوفني...سمعني الى بغيتي تعرفني ... هادي الحقيقة بلا زواق ... وتحية للأحرار لي ميحبوش النفاق ."قالك حسدونا !!
وشكون مول أونا؟؟
ياك نتوما لي هلكتونا!!
وبدولار ليهم بعتونا!!
قالك هو لايدري !!
إوا بغينا نعرفو شكون حاكم من بكري ؟؟
ومخلي الشعب فالهم يجري!!
قالك أين الثروات؟؟
شكون المحتكر الأول للأراضي والخيرات؟؟
شكون من غيرو واكل أكبر الميزانيات؟؟
قالك ملك الفقراء وهو عايش هاني!!
والمسكين كل يوم مع الخبز كيعاني!!
كذب لي قال كاين لفرق بين السادس والثاني !!
ياك قمعو الطالب والأستاذ عوتاني!!
وقال فالخطاب للشباب :
"سيرو للتكوين المهني!!
خويو الجامعات وخودو لعلم من خلود وسامحيني! ما خاصني أطر مابغيت مجازين !!
براكا غير السياحة الجنسية و موازين !! ومتنساوش نهار الجمعة انا هو أمير المؤمنين..."
ياك هو المسؤول الأول على القضاء؟؟
ردو لمغاربة عبيد وهما الأمراء ؟؟
حيت جدو أول واحد طلع للفضاء؟؟
وزيد عليها هو القائد الأول للعسكر ؟؟
وفكل مدينة عندو قصر؟؟
ولي فالأرض والسما والبحر!!
قدام عينينا كيتشفر؟؟
وحتى الميت فبلادي خصو يخلص عاد يمشي للقبر؟؟
أما الإعلام ديالو ديرين لينا شلاظة!!
ديما هو الأول حتى فالرياضة!!
وهو مول لبلان ديال أكبر طاجين وزلافة!!
وشوهة الكراطة والناموسية والشكلاطة !!
لصقوها لي لحاسين الكاپة!!
و أي قرطاسة خرجات بدون أو بمناسبة !! ينسبوها للإرهاب باش يردوه فزاعة...
باش ينتفو الريش للدرويش ...!!
ويقولو ليه متدويش راه كاينة داعيش...!!
المهم قلبتو عليها من عند حزب كاعيش .
من جيهتي غادي نبقى ساخط كاعي ...
محدو هو لفوق ومدور بيه لفاعي...
معمرني نولي حولي ويكون عندي راعي...
ولي ليوم عندو لگرون غدا يصبح واعي...
زيدو وزيد فلحباسات مبقاو يخلعونا قراعي...
دابا لي خايف بلا مايهدر ولي حر يفكر :
شكون لي يستحق عن جدارة شارة الصفر/
1- المسؤول والراعي الأول لكلشي لي فالقصر ؟؟
2-رئيس محكومته المخبول لي بفمو كتكال التومة بلا قشر...؟؟
ربيع هومازن/ الساخط على النظام.
( لي نقولوه فالزنقة الكحلة ،نقولوه فالصفحة الزرقة )
#الحرية_لولاد_المبيت
#الحرية_لكافة_المعتقلين_السياسيين
#عاش_الشعب_الحر
مواضيع ومقالات مشابهة
